Skreddaren Jon Jonsen og kona Hanna Johansdotter utvandra til Amerika i lag med dei to døtrene Hanna Caroline (fødd 26.sep 1853) og Sara Jørgine (fødd 3. mars 1856). Dei var den første familien vi kjenner til som utvandra frå Hitra. Jon Jonsen var skreddar, og han og kona Hanna og ungane budde som innerstar (leigebuarar) rundt om på gardar og husmannsplassar. For det meste heldt dei til på Fjellværsøya, ser det ut til. I 1857 var Jon Jonsen i Trondheim og ordna seg pass, og våren etter greidde dei å skrape i hop nok til å kjøpe seg billett med barken "Sverre" av Trondheim. Dei var 74 passasjerar om bord på overfarten. Turen gjekk bra, og den 30.juli 1858 var dei framme i Quebec i Canada. Derifrå gjekk reisa sørover til USA, og dei var i Chicago ei vekes tid seinare.